Пяць фактаў пра новага міністра ўнутраных справаў Юрыя Караева

 Наша Нiва 

Юры Караеў замяніў Ігара Шуневіча на пасадзе міністра ўнутраных спраў. «НН» сабрала цікавыя факты пра чыноўніка. «Цвёрды чалавек і моцны менеджар», — гэта асноўныя характарыстыкі, якія мы пачулі ад людзей, якія з ім сутыкаліся.

Асяцін, мае шмат сяброў на радзіме

Юрыю Караеву 53 гады, ён паходзіць з Паўночнай Асеціі, якая з’яўляецца часткай Расіі. Ва Уладзікаўказе працягвае жыць ягоная родная сястра Тамара. Па яе актыўнасці ў сацыяльных сетках можна зрабіць выснову, што яна вельмі ганарыцца братавымі поспехамі.

Пяць фактаў пра новага міністра ўнутраных справаў Юрыя Караева

«Ён даўно ў Беларусі. Там жаніўся, яшчэ нядаўна быў камандзірам спецназа, цяпер на пасадзе камандуючага ўнутранымі войскамі нашай братэрскай рэспублікі», — пісала Тамара знаёмым.

Па каментарах можна зразумець, што Юрыя ў Асеціі памятае вельмі шмат людзей. І ўсе яму зычаць поспехаў і іншых дабротаў. Выглядае, што пра карані не забывае і сын спадара Караева Герман. Напрыклад, у сацсетцы Укантакце ён падпісаны на суполку «Тыповы асецін».

Камандзір спецназаў

У ліпені 2008 Юры Хаджымуратавіч Караеў быў прызначаны кіраўніком мінскага спецназа, раней яго называлі АМАПам. Змяніў ён Юрыя Падабеда. Праўда, доўгі час Караеў не мог затрымацца на адным месцы. У мінскім спецназе ён запомніўся тым, як разганяў п’яную бойку ў Дзень ВДВ. А яшчэ пры Караеве ў спецназе сталі працаваць першыя жанчыны сталі працаваць у спецназе. «У асноўным працуюць падчас надгляду грамадзян, і часам даюць рады лепш, чым мужчыны», — зазначыў Караеў.

Адукацыю Караеў атрымліваў у Расіі. Ён вучыўся ў Саратаўскім інстытуце ўнутраных войскаў. Але потым яго закінула служыць у Беларусь. Да пераводу ў Мінск Караеў шэсць гадоў (1999 — 2005) кіраваў вайсковай часткай 5527 у Бабруйску, ці інакш Пятым асобным спецыяльным міліцэйскім батальёнам. Потым палкоўніка Караева перавялі ў Гомель, дзе ён камандаваў спецыяльнай міліцэйскай брыгадай (вайсковая частка 5525).

Праз тры месяцы Юрыя Караева перавялі камбатам у брыгаду спецназа ва Уруччы. Славутай часткай 3214 да гэтага камандваў Дзмітрый Паўлічэнка. Але і тут не атрымалася адпрацаваць больш за год, бо Караева заўважылі ў міністэрстве.

Пра стыль Караева-камандзіра гаворыць такі факт: «Ён салдатам казаў: хто пацісне мне руку так, што зламае яе, паедзе ў трохдзённае звольненне дахаты і атрымае сяржанта».

Караеў і Уцюрын

Цяперашні міністр унутраных справаў і арыштаваны экс-кіраўнік службы аховы Лукашэнкі Андрэй Уцюрын скончылі адну навучальную ўстанову — Саратаўскае вайскова-каманднае вучылішча. Караеў у 1987 годзе, а Уцюрын — у 1992.

Праўда, потым яны сутыкнуліся разам у вайсковай частцы 3214. Разам здавалі на крапавыя берэты. Ёсць здымак, дзе дакладна адлюстраваныя і Караеў, і Уцюрын. Праўда, цяжка іх тут ідэнтыфікаваць.

Пяць фактаў пра новага міністра ўнутраных справаў Юрыя Караева

Цікавыя адносіны ў Караева былі і з іншым знакавым сілавіком — Юрыем Падабедам. Апошні прызнаваўся, што аддаў спецназ у рукі «сябра сям’і». «Караеў — выдатны мужык, ведаю яго 12 гадоў, сябруем сем’ямі. Так што не сумнявайцеся, пытанняў з ім не будзе. Ён кантактны, прыстойны, інтэлігентны, выхаваны і правільны чалавек», — казаў Падабед.

«Кар’ерыст, але сумленны», — сказаў нам іншы чалавек з сілавых структур.

«Ён моцны менеджар. А як чалавек — цвёрды, жёсткий, па-руску кажучы, — сказаў нам іншы чалавек. — На гэтай пасадзе такі і патрэбны. Па-любому, не найгоршы варыянт».

ВКЛ і дзедаўшчына

Караеў не запляміў сябе дурнымі выказваннямі. Шмат што з яго вуснаў гучыць рацыянальна. Напрыклад, ён расказваў пра праблемы з дзедаўшчынай у войску.

Караеў гаварыў, што ў СССР існавала «махровая дзедаўшчына», якая была заснаваная на нацыянальнай варажнечы. «Пасля распаду СССР я думаў, што калі служыць будуць адны беларусы, то праблема з дзедаўшчынай знікне сама сабой. Але прыйшло засілле сяржантаў. А праз некалькі гадоў вярнулася і розніца ў прызывах. Проста ўсе дзейнічалі паводле прынцыпу: з мяне здзекаваліся — і я буду».

Караеў расказаў, што, будучы камандзірам вайсковай часткі, за два тыдні ўскрыў усю сістэму дзедаўшчыны ў ёй. За бясчынствамі стаяў намеснік камандзіра аднаго з узводаў, старшы сяржант. Па словах Караева, за парушэннем статутных адносін найперш ідзе адсутнасць камандзіра ўзвода, абыякавасць камандзіра роты, страх адказнасці з боку камандзіра часткі.

«Калі парушэнне адбылося, то задача камандзіра ўзвода — паведаміць аб гэтым і пазбавіць сябе граху прыхоўвання», — сказаў Караеў.

Таксама Юрый Караеў назваў асноўнае зло, з якім сутыкаецца малады афіцэр: «1. Алкаголь: колькі, дзе і з кім. 2. Грошы: пазыкі, заклады, гульні. 3. Начное баўленне часу: рэстараны, клубы, дыскатэкі».

«Даводзім да ладу ўсе веды па гісторыі і геаграфіі Беларусі: вобласці, гарады, сталіцы Вялікага Княства Літоўскага — у якія часы дзе што было. Калі школа дапусціла прабелы ў вывучэнні гісторыі, то мы іх выпраўляем. Бо без ведання гісторыі сваёй краіны ідэалогіі і патрыятызму быць не можа, уласна», — запэўніваў Караеў карэспандэнта «Нашай Нівы».

Сын — просты трэнер па кёкусінкаю

Сын Юрыя Караева Герман працуе трэнерам па кёкусінкаі — гэта такое японскае адзінаборства. Герман жанаты, жонку зваць Вікторыя, у пары дзяцей пакуль няма. Скончыў Беларускі дзяржаўны эканамічны ўніверсітэт.

Пяць фактаў пра новага міністра ўнутраных справаў Юрыя Караева

«Асеціны — маленькі, але горды народ», — піша Герман на сваёй старонцы.

«Любы нармальны каўказец не павінен мець фота ў памяшканні ў галаўным уборы, але пры гэтым кожны мае», — працягвае Караеў-малодшы.

Апроч каратэ, ён любіць пейнтбол, язду на аўтамабілі і більярд.

Зміцер Панкавец

Отправить ответ

avatar
7777
  Подписаться  
Уведомить